Grwpiau Intune

Mae dyfeisiau a defnyddwyr wedi’u trefnu’n grwpiau ac mae ganddyn nhw drefn enwi sy’n dechrau gyda rhif yr awdurdod lleol neu’r ysgol i’w hadnabod. Mae’r grwpiau hyn wedi’u nythu o dan grŵp awdurdod lleol lefel uchaf i ffurfio hierarchaeth o ysgolion o fewn yr awdurdod lleol hwnnw ac maen nhw wedi’u rhannu’n ddwy gangen (dyfeisiau a defnyddwyr) i ddarparu arwahanrwydd a hyblygrwydd. Mae eitemau ffurfweddu yn cael eu neilltuo i grwpiau, felly mae defnyddio strwythur hierarchaidd yn caniatáu i neilltuadau cyffredin gael eu gosod unwaith ar lefel uwch a’u hetifeddu gan y grwpiau sy’n nythu ynddo.

Mae’r strwythur grŵp hwn i’w weld o fewn Intune for Education, sy’n dangos dim ond rhan o’r hierarchaeth y mae’r gweinyddwr wedi’i gwmpasu ar ei chyfer. Yn Intune for Education, mae modd neilltuo polisïau ac anfon apiau yn uniongyrchol ar grŵp unigol hefyd.

Mae gan bob ysgol 3 grŵp dyfeisiau (Dyfeisiau Darparu, Dyfeisiau Myfyrwyr, a Dyfeisiau Athrawon), a 2 grŵp defnyddwyr (Myfyrwyr ac Athrawon) sy’n cael eu cynnal gan wasanaeth darparu Hwb gyda data o System Gwybodaeth Reoli (MIS) yr ysgol.

Gellir creu grwpiau ychwanegol trwy’r Porth Rheoli Defnyddwyr er mwyn darparu hyblygrwydd wrth neilltuo apiau a pholisïau ffurfweddu i setiau gwahanol o ddyfeisiau neu ddefnyddwyr. Mae’r holl grwpiau defnyddwyr a dyfeisiau yn cael eu creu ar yr un lefel ac ni ellir eu nythu ymhellach. Mae’n arfer gorau creu grŵp ychwanegol at ddiben penodol ac yna ymuno defnyddiwr neu ddyfais â grwpiau lluosog i gyfuno eu heffeithiau.

Enghreifftiau:

• Efallai fod cyfrifiaduron yr ystafell TG angen ap gwahanol i gyfrifiaduron eraill yn yr ysgol. Trwy greu grŵp dyfeisiau ychwanegol o’r enw "Ystafell TGCh1" a neilltuo’r ap i’r grŵp hwn yn Intune, dim ond i ddyfeisiau yn y grŵp hwn y bydd ar gael.

  • Dyfeisiau Ysgol

    • Dyfeisiau Darparu

    • Dyfeisiau Myfyrwyr

    • Dyfeisiau Athrawon

    • iPads

    • Ystafell TGCh 1

• Efallai y bydd aelodau o’r uwch dîm rheoli angen mynediad i safle diogel a gynhelir ar SharePoint ar unrhyw ddyfais maen nhw’n mewngofnodi iddi. Trwy greu grŵp defnyddwyr ychwanegol o’r enw "Tîm Uwch-reolwyr" a phennu proffil ffurfweddu a osodir i gysoni’r llyfrgell ddogfennau â’u cleient OneDrive, bydd y safle diogel a rennir ar gael i’r defnyddwyr hyn ar yr holl ddyfeisiau maen nhw’n eu defnyddio.

  • Defnyddwyr Ysgol

    • Myfyrwyr

    • Athrawon

    • Defnyddwyr Tîm Uwch-reolwyr

Mae’r grŵp Dyfeisiau Darparu yn grŵp arbennig, a grëwyd gan dîm Hwb, i roi dyfeisiau cofrestredig yn awtomatig yng nghwmpas gweinyddol yr ysgol neu’r awdurdod lleol. Mae sawl rheol i bennu aelodaeth o’r grŵp dyfeisiau darparu, a rhaid bodloni o leiaf un o’r rhain er mwyn gallu gweld a rheoli’r ddyfais:

• GroupTag = Dynodwr Darparu Dyfais*

  Dim ond yn berthnasol i ddyfeisiau Windows a ddefnyddir trwy Autopilot.

• Device Name Previx = Mae enw’r ddyfais yn dechrau gyda’r Dynodwr Darparu Dyfais*

  Yn berthnasol i bob dyfais, ond dyma’r unig reol y gellir ei bodloni wrth gofrestru dyfeisiau Windows gan ddefnyddio pecyn darparu.

• Enrolment profile name prefix = Mae’r enw proffil cofrestru yn dechrau gyda rhif yr awdurdod lleol neu’r ysgol

  Mae hyn yn berthnasol i iPads yn unig – dylai dyfeisiau Windows sy’n defnyddio Autopilot ddefnyddio’r GroupTag yn lle. Ar gyfer Awdurdodau Lleol, dylai proffiliau cofrestru ddechrau gyda’u cod 3 digid ac yna bwlch i fodloni’r rheol (e.e. “660 Enw proffil cofrestru”).

Efallai y bydd oedi cyn i ddyfeisiau ymddangos yn y grŵp dyfeisiau darparu oherwydd y rheolau deinamig sydd angen eu prosesu. Unwaith y bydd dyfais yn weladwy yn y grŵp dyfeisiau darparu efallai y bydd angen ymuno â grwpiau eraill i dderbyn yr apiau a’r polisïau perthnasol - mae modd gwneud hyn ddefnyddio’r dudalen Intune Groups yn y Porth Rheoli Defnyddwyr.

Nid ydym yn argymell defnyddio unrhyw apiau neu bolisïau i’r grŵp dyfeisiau darparu, dylid ei drin fel lle ar gyfer dyfeisiau yn unig. Dylid defnyddio grwpiau ar wahân ar gyfer proffiliau cofrestru Autopilot, a dylid cymhwyso polisïau ar gyfer ffurfweddau cyffredin i’r rhiant-grŵp dyfeisiau.

Gallwch reoli grwpiau dyfeisiau trwy’r dudalen Intune Device Groups yn y Porth Rheoli Defnyddwyr – Administration -> Intune Device Groups

Yn yr adran hon, gallwch:

• weld grwpiau dyfeisiau presennol

• creu grwpiau dyfeisiau newydd

• gweld dyfeisiau mewn grŵp dyfeisiau presennol

• symud neu ychwanegu dyfeisiau mewn grŵp dyfeisiau i grŵp dyfeisiau arall

• gweld y Dynodwr Darparu Dyfais ar gyfer eich awdurdod lleol neu’ch ysgol

• chwilio am allweddi Bitlocker a chyfrineiriau a reolir gan LAPS ar ddyfeisiau Windows

Gellir rheoli grwpiau defnyddwyr drwy’r dudalen ‘Itune Device Groups’ yn y Porth Rheoli Defnyddwyr – Administration -> Intune User Groups

Yn yr adran hon, gallwch:

• weld grwpiau defnyddwyr Intune diofyn

• creu a gweld grwpiau defnyddwyr personol

• ychwanegu neu ddileu defnyddwyr mewn grŵp defnyddwyr personol

Dim ond aelodau o grŵp Intune personol y gallwch chi eu rheoli. Mae grwpiau diofyn yn cael eu rheoli gan wasanaeth Darparu Hwb.