Disgwyliadau ac ystyriaethau allweddol ar gyfer rheoli systemau a chapasiti a ffurfweddu rhwydweithiau ar gyfer teleffoni mewn ysgolion.
Rhan o Safonau digidol addysg
Mae'r safonau isod yn nodi'r egwyddorion craidd ar gyfer gweithredu datrysiad teleffoni er mwyn sicrhau bod gan ysgolion systemau cyfathrebu dibynadwy a diogel i gefnogi anghenion gweinyddol, gweithredol a diogelu. Mae'r rhain yn cynnwys sicrhau y gall y seilwaith rhwydwaith ehangach gefnogi'r system VoIP (Protocol Llais dros y Rhyngrwyd) a ddewiswyd, yn enwedig mewn perthynas â lled band, ansawdd gwasanaeth (QoS), a gwydnwch rhwydwaith cyffredinol.
Drwy ddilyn y safonau hyn, gall ysgolion roi system teleffoni gadarn ar waith sy'n bodloni gofynion gweithredol ac yn cefnogi cyfathrebu effeithiol â dysgwyr, staff, teuluoedd a rhanddeiliaid ehangach.
Dylai ysgolion ymgynghori â'u hawdurdod lleol cyn dewis neu ddefnyddio datrysiad VoIP. Mae hyn yn sicrhau cyfatebiaeth â gwasanaethau presennol, trefniadau cymorth technegol a gofynion diogelu data. Mae cynllunio a ffurfweddu effeithiol yn hanfodol er mwyn sicrhau bod VoIP yn gweithredu'n ddibynadwy o fewn rhwydwaith TG ehangach yr ysgol.
Dylai ysgolion hefyd gyfeirio at y canllawiau cynllunio a rheoli a'r safon seilwaith rhwydwaith er mwyn deall sut mae VoIP yn rhyngweithio â gwasanaethau digidol eraill.
G1: ysgolion i gael system VoIP sy'n cael ei rheoli
Dylai ysgolion ddefnyddio system teleffoni VoIP a reolir sy'n gweithredu dros rwydwaith a chysylltiad rhyngrwyd yr ysgol.
Gall VoIP gynnig arbedion cost a gwell hyblygrwydd, fodd bynnag, mae ystod eang o systemau ar gael. Dylai ysgolion sicrhau bod y datrysiad a ddewisir yn briodol ar gyfer eu gofynion gweithredol a diogelu.
Dylai awdurdodau lleol neu bartneriaid cymorth technoleg addysg cymeradwy roi cyngor, cymorth a, lle bo hynny'n briodol, atebion a reolir yn ganolog. Mae ymgysylltu â'r partneriaid hyn yn sicrhau bod gweithrediad VoIP yn cyd-fynd â'r seilwaith presennol, trefniadau cymorth technegol a gofynion diogelu data.
G2: bod seilwaith rhwydwaith ysgolion a lled band rhyngrwyd yn ddigonol i gefnogi cyfathrebu VoIP dibynadwy
Dylai ysgolion sicrhau bod seilwaith rhwydwaith, lled band rhyngrwyd, llwybro a ffurfweddu waliau tân yn gallu cefnogi'r nifer uchaf o alwadau VoIP cydamserol a ddisgwylir heb effeithio'n andwyol ar weithgareddau dysgu, addysgu neu weinyddol.
Lle mae lled band yn caniatáu, dylid ffurfweddu Ansawdd Gwasanaeth (QoS) i flaenoriaethu traffig llais. Mae ffurfweddu cywir yn lleihau'r risg o golli galwadau, cuddni ac ansawdd sain gwael ac yn sicrhau perfformiad dibynadwy ochr yn ochr â gwasanaethau digidol hanfodol eraill.
Mae cynllunio a ffurfweddu effeithiol yn hanfodol er mwyn sicrhau bod VoIP yn gweithredu'n ddibynadwy ochr yn ochr â gwasanaethau digidol eraill a ddefnyddir ar draws yr ysgol.
G3: ysgolion i ddarparu mynediad VoIP trwy ddyfeisiau defnyddwyr, gyda setiau llaw, wedi'u pweru gan bŵer dros ether-rwyd (PoE), yn cael eu defnyddio lle bo angen yn weithredol
Nid oes angen setiau llaw pwrpasol ar gyfer pob defnyddiwr ar wasanaethau VoIP. Lle bynnag y bo modd, dylai staff gael mynediad at VoIP trwy ddyfeisiau defnyddwyr cymeradwy, megis gliniaduron neu ddyfeisiau symudol sy’n defnyddio cymwysiadau ffôn meddal.
Dylid defnyddio setiau llaw VoIP ffisegol mewn lleoliadau strategol, gan gynnwys swyddfeydd, derbynfeydd, ceginau a mannau gweithredu allweddol eraill.
Pan ddefnyddir setiau llaw, dylid eu pweru trwy Bŵer dros Ether-rwyd (PoE) lle bynnag y bo modd er mwyn symleiddio gosod a rheoli. Mae PoE yn galluogi data a phŵer i gael eu darparu trwy un cebl rhwydwaith, gan gael gwared â’r angen am addaswyr pŵer ar wahân.
Dylai ysgolion sicrhau bod eu datrysiad VoIP dewisol yn cael ei gefnogi'n llawn gan gapasiti rhwydwaith presennol, gan gynnwys gofynion pŵer a data, er mwyn cynnal perfformiad dibynadwy ac osgoi gorlwytho’r seilwaith cyfnewid.
G4: ysgolion i sicrhau pan ddefnyddir darparwr heblaw'r awdurdod lleol, bod llinellau atebolrwydd clir ar gyfer cefnogi'r datrysiad VOIP
Pan fydd datrysiad VoIP yn cael ei ddarparu neu ei gefnogi gan sefydliad heblaw'r awdurdod lleol, dylai ysgolion sicrhau bod llinellau atebolrwydd clir yn cael eu sefydlu.
Dylai fod gan ysgolion ddealltwriaeth glir o ba bartner cymorth technoleg addysg sy'n gyfrifol am bob elfen o'r system VoIP, gan gynnwys seilwaith, meddalwedd a ffurfweddu rhwydwaith.
Mae cyfrifoldebau wedi'u diffinio'n glir yn cefnogi datrys problemau effeithiol, yn lleihau amser segur ac yn helpu i sicrhau bod gwasanaethau cyfathrebu hanfodol yn parhau i fod yn ddibynadwy ac yn ymatebol pan fydd problemau yn codi.